തെലുങ്കില്‍ സംഗീത സംവിധാനത്തില്‍ നിന്ന്‌ സംവിധാനത്തിലേക്ക്‌ തിരിഞ്ഞ വ്യക്‌തിയാണ്‌ ആര്‍ പി പട്‌നായിക്‌. അദ്ദേഹത്തിന്റെ ആദ്യ ചിത്രമായ ബ്രോക്കര്‍, ഒരേസമയം ബോക്‌സോഫീസിലും ചലച്ചിത്രനിരൂപകര്‍ക്കിടയിലും ശ്രദ്ധിക്കപ്പെട്ടു. ഇപ്പോഴിതാ സോഷ്യല്‍നെറ്റ്‌വര്‍ക്കിംഗ്‌ രംഗത്തെ അതികായരായ ഫേസ്‌ബുക്ക്‌ പ്രമേയമാക്കി ഒരു ചിത്രം ഒരുക്കുകയാണ്‌ പട്‌നായിക്ക്‌. ഇതിലൂടെ യുവതലമുറയുടെ മുഖ്യ പ്രശ്‌നമായ സൈബര്‍ ക്രൈം സാധാരണക്കാര്‍ക്ക്‌ മനസിലാകുന്ന രീതിയില്‍ അവതരിപ്പിക്കുകയാണ്‌ ആര്‍ പി പട്‌നായിക്കിന്റെ ലക്ഷ്യം. ഫേസ്‌ബുക്ക്‌ എന്ന്‌ പേരിട്ടിരിക്കുന്ന ഈ ചിത്രത്തില്‍ സോഷ്യല്‍നെറ്റ്‌വര്‍ക്കിംഗ്‌ സൈറ്റുകളിലും മറ്റും വ്യാജ അക്കൗണ്ടുകള്‍ സൃഷ്‌ടിച്ച്‌ ചെയ്യുന്ന കുറ്റകൃത്യങ്ങളെക്കുറിച്ചാണ്‌ പ്രതിപാദിക്കുന്നത്‌. മല്ലാ വിജയ്‌ പ്രസാദ്‌ നിര്‍മ്മിക്കുന്ന ഫേസ്‌ബുക്കിന്റെ ചിത്രീകരണം അന്തിമഘട്ടത്തിലാണ്‌. നിശ്‌ചല്‍, ഉദയ്‌, സൂര്യ തേജ്‌, ജെമിനി സൂരേഷ്‌ അര്‍ച്ചന ശര്‍മ്മ, നിഷ ഷെട്ടി, പ്രീതി എന്നിവരാണ്‌ പ്രധാന അഭിനേതാക്കള്‍. സോഷ്യല്‍നെറ്റ്‌വര്‍ക്കിംഗ്‌ സൈറ്റുകള്‍ കൊണ്ട്‌ നിരവധി ഗുണങ്ങളും ദോഷങ്ങളുമുണ്ടെന്ന്‌ ആര്‍ പി പട്‌നായിക്‌ പറയുന്നു. ഇവ പൊതുസമൂഹത്തിന്‌ മുന്നില്‍ തുറന്നുകാട്ടുകയാണ്‌ ഫേസ്‌ബുക്ക്‌ എന്ന സിനിമയിലൂടെ ലക്ഷ്യമിടുന്നതെന്നും അദ്ദേഹം പറഞ്ഞു.
No comments:
Post a Comment